Тропарь, Глас 3
Столпе воодушевленный воздержания, адаманте неколебимый Церкве, Стилиане, соделался еси, блаженне. Господу от юности вверился еси, обиталище Духа явился еси, отче преподобне, Христа Бога моли даровати нам велию милость.
Кондак, Глас 4
От утробы матерния освятивыйся, яко божественный Самуил, богоносне, подвижнически Христа Бога прославил еси. Темже исцелений показался еси кладязь и предстатель божественный отроков и младенцев, Христос бо тя светло славит, Егоже измлада, Стилиане, прославил еси.
Молитва о здравии детей и младенцев (Молитва 1-я)
О священная главо, преподобне отче Стилиане! Подвигом добрым подвизався на земли, на небесех восприял еси венец правды от Христа Бога нашего. Темже на твой святый образ взирающе, о преславнем скончании жительства твоего радуемся и чтим святую память твою. Почитающе же твое велие дерзновение пред Господем, со смирением молим тя, преподобне отче: воззри убо благосердым оком любве твоея на нас, недостойных рабов твоих, и потщися богоприятным твоим ходатайством испросити у Царя царствующих и Господа господствующих, да пробавит великия и богатыя милости Своя на нас, грешных, да подаст нам дух правыя веры, дух любве, мира и радости о Дусе Святе, да избавит ны от всяких бед и напастей, да ниспослет вся полезная ко спасению душ наших. Ей, святче Божий, не посрами упования нашего, еже на тя по Бозе и Богородице возлагаем, но буди нам помощник и покровитель во спасение, да сподобимся скончати житие наше в покаянии и восприимем вечная благая во Царствии Христа Бога нашего, и прославим человеколюбие Отца и Сына и Святого Духа, и твое святое заступление, ныне и присно и во веки веков. Аминь.
Молитва родителей от всех недугов (Молитва 2-я)
О, преподобне отче Стилиане, крепосте и путевождю молитв наших! Ты страсти телесныя препобедив и со ангелы вселився, непрестанно зриши славу, уготованную святым, небеснаго веселия исполняяся. Ныне, в невечернем свете пребывая и Царю Христу предстоя, не забуди уповающыя на тя, иже со дерзновением молитвы к тебе возносят, просяще у тебе укрепления. Ты, от чрева матерня освященный, сосуд Духа Святаго соделавыйся, простираяй теплое попечение о матерех же и чадех, свобождаяй тыя печали и скорби, покажи ся скорый врач страстей и болезней душевных же и телесных хвалящих тя. Ты, Пафлагонию местом прославления Святыя Троицы соделавый, ныне пустыню сердец наших в плодородную землю претвори, да достойны дара божественнаго явятся, процветут крины веры спасительныя и умножат плоды подвигов добрых. О, преподобне отче Стилиане! Сохрани твоими молитвами семьи и чада наша, моля Милостиваго Бога о прощении грехов, здравии и спасении, да с тобою вкупе восхвалим всесвятое имя Отца и Сына и Святаго Духа. Аминь.
