Молитвы Василию Блаженному

Житие твое, Василие, неложное, и чистота нескверна, Христа ради тело твое изнурил еси постом и бдением, и мразом и теплотою солнечною, и слотою и дождевным облаком, и просветися лице твое, яко солнце, и ныне приходят к тебе Российстии народи и вси людие, прославляюще святое твое успение. Тем Христа Бога моли, да избавит ны от варварскаго пленения и междоусобныя брани, и мир мирови подаст и душам нашим велию милость.

Я́коже бо со́лнце и луна́ нагото́ю свое́ю не срамля́ются,/ та́ко и ты, уго́дниче Христо́в Васи́лие, наг сый, не срамля́шеся,/ восприя́т бо ри́зу Ада́ма первозда́ннаго,/ ю́же он ноша́ше пре́жде в раи́,/ ты же сию́ на земли́ поноси́л еси́;/ и был еси́ до́брый купе́ц:/ ели́ко име́яше, вся оста́ви/ и купи́ мздо́ю терпе́ния своего́ село́,/ на не́мже сокрове́н безце́нный Би́сер, Христо́с./ Сего́ ра́ди яви́ся всем гре́шным о́браз покая́ния/ и всели́ся в ра́йскую широту́,/ и, предстоя́ Христо́ви,/ не забу́ди град, в не́мже обита́, и лю́ди, преблаже́нне,// и моли́ спасти́ ду́ши на́ша.
Перевод: Так же как солнце и луна не стыдятся своей наготы, так и ты, угодник Христов Василий, быв нагим не стыдился, ибо получил одежду Адама первозданного, которую он носил раньше в раю, ты же ее на земле носил, и был ты хорошим купцом, который оставил все, что имел (Мф.13:45-46), и купил ценой терпения своего место, где был сокрыт бесценный Жемчуг, Христос. Потому ты стал для всех грешных примером покаяния и поселился в райскую широту, где, предстоя Христу, не забывай город, в котором ты жил и людей, преблаженный, и моли спасти души наши.

Плоть удручи́вшу ти злострада́нием,/ ду́шу же просвети́вшу чистото́ю се́рдца,/ обогати́лся еси́ благода́тию Пресвята́го Ду́ха, Васи́лие,/ дарова́ти тре́бующим поле́зная./ Сего́ ра́ди неду́жнии, притека́юще к цельбопода́тельному твоему́ гро́бу, премудроюро́де,/ незави́стно прие́млют боле́зней отложе́ние/ и благода́рственно воспева́ют просла́вльшаго тя,// Еди́наго Человеколю́бца.
Перевод: Плоть изнурив свою терпением напастей, душу же просветив чистотою сердца, обогатился ты благодатью Пресвятого Духа, Василий, даровать просящим полезное. Потому больные, приходящие к подающему исцеления твоему гробу, премудрый юродивый, обильно получают болезней отступление и с благодарностью воспевают прославившего тебя, Единственного Человеколюбца.

Духом Божиим водим, преблаженне Василие, оттрясл еси мирский мятеж, и жития треволнения возгнушался еси, и, совлекся одеяний тленных и облекся в ризу безстрастия, убежал еси ловления льстиваго миродержца, и был еси странен во твоем языце, и, паче земнаго богатства избрав богатство Небесное, увязлся еси венцем терпения. И ныне, преблаженне Василие, моли Христа Бога о творящих святую память твою, да зовем ти: радуйся, преблаженне Василие.

Яви́л тя есть Госпо́дь ны́нешнему ро́ду/ исцели́теля боле́знем и прогони́теля неду́гом/ любо́вию, Васи́лие, притека́ющим к тебе́// и призыва́ющим ве́рою моли́твы твоя́.
Перевод: Явил тебя Господь нынешнему поколению, как исцеляющего раны и вылечивающего болезни всех с любовью обращающихся к тебе и призывающих с верой молитвы твои.

О, вели́кий уго́дниче Христо́в, и́стинный дру́же и ве́рный ра́бе Всетворца́ Го́спода Бо́га, переблаже́нне Васи́лие! Услы́ши ны, многогре́шныя, ны́не вопию́щия к Тебе́ и призыва́ющия имя́ Твое́ свято́е, поми́луй ны, припа́дающия Днесь к пречи́стому о́бразу Твоему́, приими́ ма́лое на́ше и недосто́йное сие́ моле́ние, умилосе́рдися над убо́жеством на́шим, и моли́твами Твои́ми исцели́ всяк неду́г и боле́знь души́ и те́ла на́шего гре́шнаго, и сподо́би ны тече́ние жи́зни сея́ невреди́мо от ви́димых и неви́димых враго́в безгре́шно прейти́, и христиа́нскую кончи́ну, непосты́дну, ми́рну, безмяте́жну, и Небе́снаго Ца́рствия насле́дие получи́ти со все́ми святы́ми во ве́ки веко́в. Ами́нь.

О блаженная душе, о премудрости исполненный разуме: возсия бо нам светонезаходимое солнце веселия, просвещая Российское царство: от бесов уязвленных исцелитель, паче же и самих бесов прогонитель, слепым прозрение, хромым хождение, сляченным исправление, болящим всем исцеление и здравие: от бед и скорбей избавление, печальным утешение.

О, вели́кий уго́дниче Христо́в, переблаже́нне Васи́лие! Припа́дающе к ра́це моще́й твои́х, с ве́рою лобыза́ем честны́й твой о́браз, ча́юще от него́ си́лою Бо́жиею получи́ти исцеле́ние душ и теле́с на́ших, прославля́ем вели́чество Вседержи́теля Бо́га, Его́же ты душе́ю и те́лом твои́м в жи́зни сей просла́вил еси́, ублажа́ем тве́рдость ве́ры и любве́ твое́й ко Го́споду Савао́фу, пропове́дуем кре́пость Твоего́ Ду́ха и, воспомина́юще вели́кия по́двиги доброде́тели твое́й, вопие́м к Тебе́ из глубины́ серде́ц на́ших: не премолчи́ вопи́ти за ны ко Го́споду Бо́гу, те́лом бо Твои́м пребыва́еши с на́ми на земли́, ду́хом же почива́еши на Небе́си́ во объя́тиих Зижди́теля Твоего́. Предста́тельством у́бо Твои́м у Престо́ла непристу́пныя сла́вы, испроси́, да почи́ет и на нас Дух Бо́жий, дух прему́дрости и ра́зума, дух сове́та и кре́пости, дух ве́дения и благоче́стия и стра́ха Бо́жия, и да не пре́зриши многогре́шных на́ших моле́ний. Се мы, предстоя́ще в хра́ме, посвяще́ннем и́мени твоему́ свято́му, воспису́ем ти похва́льная си́це: ра́дуйся, Богоблаже́нне Васи́лие, я́ко ты, возненави́дев вре́менная ми́ра, богоуго́дно подвиза́лся еси́ и на высоту́ доброде́телей восте́кл еси́. Ра́дуйся, я́ко потща́лся еси́ победи́ти страсть со все́ми поро́чными ея́ скло́нностьми и дарова́ний Свята́го Ду́ха сподо́бился еси́. Ра́дуйся, я́ко показа́лся еси́ ми́рови юрод бы́ти, чистото́ю же души́ мудр Бо́гови яви́лся еси́. Ра́дуйся, я́ко в терпе́нии и страда́нии храбр яви́лся еси́ и вся стре́лы лука́ваго разжже́нныя погаси́л еси́. Ра́дуйся, я́ко жела́нием от исто́чник изра́илевых всегда́ почерпа́я, благода́ти Бо́жия преиспо́лнен был еси́. Ра́дуйся, я́ко, взем яре́м спаси́тельнаго словесе́ Христа́ Бо́га на́шего, попра́л еси́ всю горды́ню ми́ра. Ра́дуйся, я́ко посреде́ молв безмо́лвие сохрани́л еси́, мысль твою́ бы́стро устремля́я к Го́рним. Ра́дуйся, я́ко ты мече́м духо́вным во́лю хоте́ния твоего́ отсеца́л еси́ и сто́пы ра́зума твоего́ утвержда́л еси́ на ка́мени любве́ Христо́вы. Ра́дуйся, я́ко совле́клся еси́ тле́нных одея́ний и обле́клся еси́ в но́ваго челове́ка, обновле́на кро́вию Христо́вою. Ра́дуйся, я́ко в ме́сто тле́нных бога́тство духо́вное собра́л еси́ и нача́тки трудо́в Христу́ Бо́гу на́шему прине́сл еси́. Ра́дуйся, я́ко и по сме́рти Госпо́дь яви тя нам исто́чника исцеле́ний. Ра́дуйся, я́ко, сла́вы и бога́тства не восхоте́в, вся в ничто́же вмени́л еси́, да Христа́ приобря́щеши, Его́же и стяжа́л еси́ мно́гими труды́ и терпе́нием. Ра́дуйся, я́ко ны́не, соединя́яся с Бо́гом, непреста́нным Его́ зре́нием наслажда́ешися и обита́еши во блаже́нней ве́чности. Ра́дуйся, я́ко насыща́ешися благи́ми, и́хже о́ко не ви́де, и у́хо не слы́ша, и на се́рдце челове́ку не взыдо́ша, я́же угото́ва Бог та́ко возлюби́вшему Его́, поспешеству́й у́бо моли́твами Твои́ми, избра́нниче Бо́жий, да и мы на земли́, совоку́плени крепча́йшим любве́ Бо́жия сою́зом, великоду́шно понесе́м благо́е Ева́нгелия и́го и благода́тию Свята́го Ду́ха да сподо́бимся вкуси́ти и насыща́тися ве́чно с тобо́ю Небе́сных немерца́емых благ. Ами́нь.

О угодниче Христов, преблаженне Василие! Услыши ны, многогрешныя, ныне вопиющия к тебе: помилуй ны, раб Божиих (имена), и умилосердися над убожеством нашим! и молитвами твоими исцели всяк недуг и болезнь души и тела нашего грешнаго, и сподоби ны течение жизни сея невредимо, от видимых и невидимых враг, и безгрешно прейти, и христианскую кончину непостыдну, мирну, безмятежну, и Небеснаго Царствия наследие получити, со всеми святыми, во веки веков.

О, Влады́ко Христе́, Сы́не Бо́жий, Исто́чниче жи́зни и просвеще́ния, Долготерпели́вый и Многоми́лостивый, пода́ждь на́м сла́вити пресвято́е и пресла́вное Твое́ и́мя бо́дренно во испове́дании серде́чном во вся́ дни́ живота́ на́шего, до после́дняго часа́. Ели́ко хо́щеши, мо́жеши, вели́ка бо е́сть сла́ва премно́гаго Твоего́ милосе́рдия и непостижи́ма всему́ рожде́нному естеству́. Ка́ко прете́рпит язы́к на́ш, таковы́я во ра́дости и весе́лия испо́лни на́с, теле́снаго и духо́внаго? Или́ ка́ко воспое́м благода́ть Твою́ неизрече́нную, и́стинным жела́нием усе́рдно велича́ем и славосло́вим милосе́рдие Твое́, я́ко дарова́ на́м Своего́ уго́дника, блаже́ннаго Васи́лия? Толи́ко ду́хом к Тебе́ зове́м: о, Го́споди, Живы́й, Непристу́пный, Стра́шный, Ми́лостивый и Ще́дрый, Ви́димый и Неви́димый, поми́луй на́с, всегда́ Тебе́ со слеза́ми зову́щих, и просвеща́й на́с, Своего́ ра́ди уго́дника, пресве́тло ми́лостивыми чудесы́. О, благи́й Царю́ всея́ тва́ри! Поми́луй Боже́ственным твои́м пресветломи́лостивым изволе́нием хоте́ния Своего́ и похвалу́ сла́вы благода́ти Своея́ приими́ по премно́гому милосе́рдию Своему́, вели́чествия ра́ди прехва́льнаго Твоего́ и́мене, и Пречи́стыя Твоея́ Ма́тере, Пресла́вныя, Преблагослове́нныя и Пренепоро́чныя Присноде́вы Мари́и, и святы́х сла́вных и всехва́льных апо́стол, и проро́к, и му́ченик, преподо́бных и пра́ведных ра́ди, и свята́го богому́драго юро́да Твоего́, преблаже́ннаго Васи́лия, и все́х святы́х ра́ди Свои́х уго́дник, возвели́чи, Го́споди, Ру́сь Правосла́вную пред лати́ны и басурма́ны и про́чими язы́ки, враги́ ея́ и супоста́ты покори́, Го́споди, во́и же ея́ хра́бры сотвори́ и огради́ я́ А́нгелы святы́ми Свои́ми, и все́м правосла́вным христиа́ном в целому́дрии, и в ми́ре, и в благоде́нствии пребыва́ти соблаговоли́, и о́блаком небе́сным повели́ дождя́ благода́рственно земли́ во благопотре́бно вре́мя, я́же бо во препита́ние лю́дем Твои́м и траву́ ското́м, испо́лни я́ вся́кия благода́ти в ро́д и ро́д во ве́ки веко́в, я́ко Ты́ еси́ Бо́г ми́ру и Спаси́тель душа́м на́шим, Твое́ бо е́сть, е́же ми́ловати и спаса́ти, Свя́т еси́ Ты́, Го́споди Бо́же на́ш, и Тебе́ сла́ву возсыла́ем, со Отце́м и Святы́м Ду́хом, всегда́, ны́не и при́сно и во ве́ки веко́в. Ами́нь.